ХХААХҮ-ийн Сайдын “Өндөржүүлсэн бэлэн байдлын үед штабын зохион байгуулалтаар ажиллах тухай” А-77 дугаар тушаалаар байгуулагдсан Хүнсний хангамж, аюулгүй байдлын штаб өчигдөр хуралдлаа. Штаб нь хүнсний хангамж, аюулгүй байдал, хүнсний гол нэрийн бүтээгдэхүүний нөөц, ашиглалтыг нэмэгдүүлэх үйл ажиллагааг эрчимжүүлэх, хэрэгжилтийг зохион байгуулах, хяналт тавих чиглэлээр ажиллаж байна. Хурлыг штабын дарга, Хүнс, хөдөө аж ахуй, хөнгөн үйлдвэрийн Дэд сайд Ж.Сауле удирдан явуулж, хурлын бүрэлдэхүүнд ХХААХҮ-ийн яамны холбогдох газар хэлтсээс гадна МЭЕГ, МХЕГ, НЗАА, ХААБ, НМЭГ зэрэг байгууллагуудын төлөөлөл оролцлоо.
Хурлаар хүнсний гол нэрийн бүтээгдэхүүний нөөц, үнийн талаарх мэдээлэл, нөөцийн махны худалдааны явц, хяналт шалгалтын үр дүн, хүнсний гол нэрийн импортын бүтээгдэхүүний нөөцийг нэмэгдүүлэх, хангамжийг тогтвортой байлгах чиглэлээр авч хэрэгжүүлж байгаа арга хэмжээний талаар мэдээлэл солилцлоо. Мөн өрхийн түвшинд хүнсний нөөцийг судлах судалгаа, “Малчин лавлах-109” утсаар ирсэн санал, гомдолтой танилцлаа. Хурлын төгсгөлд штабын дарга Ж.Сауле хүнсний гол нэрийн бүтээгдэхүүний нөөцийг нэмэгдүүлэх чиглэлээр авч хэрэгжүүлж байгаа болон штабын төлөвлөгөөнд туссан ажлуудыг эрчимжүүлэх чиглэлээр үүрэг чиглэл өгсөн юм.
