Хүн ам, орон сууцны 2020 оны улсын ээлжит тооллого эхлэхэд 20 гаруй хоног үлдэж байгаатай холбогдуулан өчигдөр Сүхбаатар дүүргийн тооллогын комиссын ээлжит хуралдаан боллоо.
Хуралдааныг дүүргийн Тооллогын комиссын дарга бөгөөд Засаг дарга Х.Болормаа нээж, дүүргийн түр товчооны дарга Д.Нарантуяа хороодын түр товчооны дарга нарт өрх хүн амын бүртгэл хөтлөлт, Хүн ам, өрхийн мэдээллийн сангийн шинэчлэлт, баяжилтын явцыг танилцуулав.
Хуралдаанаар тооллогын бэлтгэл ажлыг эрчимжүүлэх, сурталчилгааны ажлыг өргөжүүлэх, ялангуяа иргэд registration.mn хаягаар дан танилт нэвтрэлтийн системд нэвтэрч, Хүн ам, өрхийн мэдээллийн сан дахь өөрийн болон өрхийн гишүүдийн мэдээллээ шалгаж баталгаажуулах ажлыг хэрхэн сурталчлах талаар ярилцаж, хуралдаанаас нэгдсэн шийдвэр гаргалаа.
Хуралдааны төгсгөлд дүүргийн Тооллогын комиссын даргаас хорооны түр товчооны дарга нарт “Тооллого-2020” аяны хүрээнд удирдамжийн дагуу улсын томоохон тооллогын бэлтгэл ажлыг эрчимжүүлэн, сурталчилгааны ажлыг өөрийн хариуцсан нутаг дэвсгэрийн хэмжээнд үр дүнтэй зохион байгуулж ажиллахыг үүрэг болгов.