Монголын Худалдаа эрхчлэгчдийн холбоо Монгол Улсын Ерөнхий сайд У.Хүрэлсүхэд шаардлага хүргүүлж, шүүхэд өгөхөөр болсон гэдгээ мэдэгдлээ. Хувиараа бизнес эрхлэгчид “Нарантуул” олон улсын худалдааны төвийн үүдэнд жагсаал зохион байгуулж, шаардлагаа танилцуулсан юм.
Худалдаа эрхлэгчид хөл хорио тогтоосны улмаас үүдэж, бараа бүтээгдэхүүн муудсан, лангууны төлбөр гарсан зэрэг хохирлоо барагдуулахаар шүүхэд хандаж байгаа аж.
Харин шаардлагад түрээсийн төлбөрийг зогсоох, хуульд тусгах, банк, банк бус санхүүгийн зээлийн хүүг зарцаах, улсын төсөвт тодотгол хийж, цар тахлын үед иргэдэд мөнгөн олговор олгох, эрсдлийн сангаас бизнес эрхлэгчдээ дэмжих, тэг зогсолтоос үүдэж муудсан бараа бүтээгдэхүүний хохирлыг барагдуулах зэрэг шаардлага багтсан байна.
Энэ талаар Монголын худалдаачдын холбооны тэргүүн Т.Энхсайхан “Төр засаг худалдаа эрхчлэгчдэд урьдчилан мэдэгдэлгүйгээр гэнэт хөл хорио тогтоосон нь түрээсийн хүндрэл үүсэх шалтгаан боллоо. Худалдааны төвүүд хаасан ч түрээслэгч нар лангууны түрээсээ нэхэж, бараа бүтээгдэхүүн нь хуучирч, муудах асуудал гарч байна. Монголын худалдаачид 30 жил төр засгаас юу ч гуйгаагүй бор зүрхээрээ явж, татвар хураамжаа төлсөөр ирсэн. Гэтэл төр засаг худалдаачдынхаа асуудлыг шийдэж, бусад улс орны жишгээр хандах хэрэгтэй байна.
Монголын Худалдаа эрхчлэгчдийн холбоо Монгол Улсын Ерөнхий сайд У.Хүрэлсүхэд шаардлага хүргүүлж, шүүхэд өгөхөөр болсон. Хөл хорио тогтоосны улмаас үүдэж, бараа бүтээгдэхүүн муудсан, лангууны төлбөр гарсан зэрэг хохирлоо барагдуулахаар шүүхэд хандаж байгаа юм” гэлээ.