Үер, уснаас сэрэмжлүүлэх мэдээллийг өдөр бүр хүргэж байгаа боловч усанд эндэх тохиолдол буурахгүй байна. Тухайлбал: Хөвсгөл аймгийн Ренчинлхүмбэ сумын Хөндий багийн “Шишгэдийн гол”-д зургаадугаар сарын 27-ны өдөр Хазаарын хоолой гэдэг газар бургасанд тээглэн усны мандал дээр гарсан цогцосыг гаргаж авсан бол долдугаар сарын 29-нд Сэлэнгэ аймгийн Сайхан сумын нутаг дэвсгэр, Эрдэнэтийн гүүрний баруун урд байрлах тогтмол усанд морь унасан хүн ороод гарч ирэхгүй байна гэсэн дуудлагыг хүлээн авч тус аймгийн Онцгой байдлын газрын 7 албан хаагч, 1 техник хэрэгсэлтэйгээр ажиллаж, иргэн Э /33 настай, эрэгтэй/ морьтойгоо осолдож нас барсан байсныг гаргаж авчээ.
Мөн Баянзүрх дүүргийн 26 дугаар хороо, Төмөр замын урд тогтоол усанд 2 хүүхэд живсэн гэсэн дуудлагыг энэ сарын 30-ны өдрийн 00:16 цагт хүлээн авч Нийслэлийн Онцгой байдлын газрын 6 албан хаагч ажиллаж Т.Эрдэнэхүү /6 настай, эрэгтэй/, Э /9 настай, эрэгтэй/ нарын цогцсыг уснаас гаргаж Цагдаагийн байгууллагад хүлээлгэн өгчээ.
О.ӨНӨР