Нийслэлийн төвийн зургаан дүүрэгт хоёр болон түүнээс дээш жил ашиглаагүй газруудад хяналт шалгалт хийжээ. Уг асуудлаар нийслэлийн Мэргэжлийн хяналтын газрын дэд дарга С.Даваасүрэн мэдээлэл хийлээ. Шалгалтаар газраа хоёр ба түүнээс дээш жил ашиглаагүй, зориулалтын бусаар ашиглаж байгаа 116 газар байгааг илрүүлжээ. “Энэ газруудыг иргэн, ААН нь ашиглаагүй, зарим газрыг ухаад олон жил орхисноос хог үүссэн, бороо, хөрсний ус хуримтлагдаж ойр орчмын ая тухтай байдлыг алдагдуулсан байдалтайгаас гадна хүүхэд унаж гэмтэх эрсдэл байна. Мөн зарим газрыг хашаалаад олон жил ашиглаагүйгээс хашаа нь эвдрэх, хүн гэмтээх эрсдэл үүссэн.
Иймд бид хуулийн дагуу иргэн, ААН-үүдийг дуудаж, сонсох ажиллагаа явуулсан. Монгол Улсад мөрдөгдөж байгаа Газрын тухай хуульд хүндэтгэн үзэх шалтгаангүйгээр, гэрээнд заасан нөхцөлөөр хоёр жил ашиглаагүй бол тухай газрыг цуцлах тухай заасанчлан нийслэлийн Засаг даргад санал хүргүүлсэн. 15 жил хүндэтгэн үзэх шалтгаантай байна гэж байхгүй” гэлээ.
Газрын тухай хуулийн
35.3.1 газар эзэмших гэрээнд заасан нөхцөл, болзлыг биелүүлэх;
35.3.2.газрыг үр ашигтай, зохистой ашиглах, хамгаалах, байгаль орчныг хамгаалах тухай хууль тогтоомж болон төрийн эрх бүхий байгууллагаас газар ашиглалттай холбогдуулан тавьсан нийтлэг шаардлагыг биелүүлэх;
40.1.Аймаг, нийслэл, сум, дүүргийн Засаг дарга дараахь тохиолдолд газар эзэмших эрхийн гэрчилгээг хүчингүй болгоно” гэсэн заалтуудыг үндэслэн зөрчил илэрсэн 116 газрын газар эзэмших эрхийг цуцлах, зөвшөөрлийг хүчингүй болгох саналыг нийслэлийн Засаг даргад хүргүүлсэн байна.