Нийслэлийн мэргэжлийн хяналтын газрын байгаль орчны хяналтын улсын байцаагчид ногоон бүс, томоохон худалдааны төвүүд, авто тээвэр шалган бүртгэх товчоо, хяналтын постуудаар 80 орчим удаагийн хяналт шалгалтыг хийжээ.
Шалгалтаар 60 орчим зөрчил илрүүлж, 19 иргэнийг цагдаагийн байгууллагад шилжүүлэн шалгуулж, 34 иргэнд торгууль ногдуудсан байна. Тухайлбал,
Иргэн Д.Жумдаандорж хууль бусаар нэн ховор амьтан болох хандгай агнаж, тул загас барьсан, н.Мөнхбат, н.Гүрбазар нар 352 ширхэг тарваганы гаралтай түүхий эд тээвэрлэж явсан бол Д.Нямдаваа 10 ширхэг тарваганы тулам хот руу оруулахыг завдаж,
Катар улсын Батлан хамгаалахын сайдын бие төлөөлөгч Мохамед Хассан Аль-Тхавади тусгай зөвшөөрөлд заасан хэмжээнээс 31 толгой идлэг шонхор шувуу илүү барьсан зөрчлүүд илэрчээ.
Хяналт шалгалтын явцад зөрчил гаргагчдаас нийт 570 ширхэг тарваганы нойтон мах, тулам илрүүлж, зөршөөрөлгүйгээр барьсан гурван толгой ногтруу шувууг байгальд нь буцаан тавьж, 10 кг орчим бугын ясан эвэр, 100 кг орчим хөлдөөсөн загас, хоёр ширхэг нугас шувууны мах, гурван ширхэг цагаан зээрийн гулуузыг хураан авсан байна.