Ховд аймагт наймдугаар ангийн 15 настай охин бусдад зодуулж нас барсан гэх мэдээлэл бидэнд ирлээ.
Тодруулбал, Ховд аймгийн хоёрдугаар сургуулийн сурагчийг үе тэнгийнх нь гурван охин нийлж зоджээ. Улмаар зодуулсныхаа дараа эмнэлэгт очиж үзүүлсэн ч “зүгээр, гайгүй” хэмээн буцааснаас долоо хоногийн дараа амиа алдсан гэх мэдээллийг эх сурвалж бидэнд өгсөн юм.
Эх сурвалжийн хэлж буйгаар, нас барсан охиныг задлан шинжилгээгээр “тархи нь бяцарсан” гэх хариу дүгнэлт гарсан гэв.
Мөн хамгийн ноцтой нь талийгч охины гар утсанд “Энүүгээр дахиж үзэгдэх юм бол үгүй хийнэ шүү” гэх утга бүхий заналхийлсэн зурвас ирсэн байсан тухай хэлсэн юм.
Одоогийн байдлаар холбогдох албанынхан энэ асуудлаар мэдээлэл хийгээгүй байгаа аж. Мөн зурвас илгээсэн утасны дугаараар тухайн хүүхдүүдийг олж тогтоосон бөгөөд хоёр нь талийгч охины таньдаг хүүхэд байсан гэх мэдээлэл байна. Гэвч хэрэгт холбоотой хүүхдүүдийг олоогүй, бариагүй байгаа гэлээ.