Ховд аймгийн Жаргалант сумын нутагт боом өвчин гарсантай холбогдуулан тус аймгийн Онцгой комиссийн шийдвэрээр сургууль, цэцэрлэгийн нээлтийн үйл ажиллагааг есдүгээр сарын 10 хүртэл хойшлуулаад байсан. Тэгвэл өнөөдөр Ховд аймгийн Жаргалант сумын ерөнхий боловсролын сургууль, цэцэрлэгийн 2018-2019 оны хичээлийн жилийн нээлтийг хийлээ.
Аймгийн Засаг дарга Д.Галсандондог, аймгийн Боловсрол, соёл, урлагийн газрын дарга М.Пүрэвхүү болон холбогдох албаны хүмүүс сургууль, цэцэрлэгийн нээлтийн арга хэмжээнүүдэд оролцож, багш сурган хүмүүжүүлэгч, хүүхэд багачуудад сурлага хөдөлмөрийн амжилт хүслээ.
Ховд аймгийн хэмжээнд 2018-2019 оны хичээлийн жилд ерөнхий боловсролын 25 сургуульд 19419 сурагч хичээллэж, төрийн өмчийн 32 цэцэрлэг, хувийн хэвшлийн 13 цэцэрлэгт 7500 гаруй хүүхэд хамрагдаж байна. Мөн энэ хичээлийн жилд 5 настай хүүхдийг сургуулийн өмнөх боловсролд, зургаан настай хүүхдийг нэгдүгээр ангид бүрэн хамруулах зорилт дэвшүүлж, нэгдүгээр ангид 2013 сурагчийг хамруулжээ.
Монгол Улсын Засгийн газрын үйл ажиллагаа, БСШУСЯ-ны зорилт, Ховд аймгийн Засаг даргын үйл ажиллагааны хөтөлбөрийн хүрээнд аймгийн Боловсролын салбарт шинэчлэлийг эрчимжүүлэх, байгууллагын менежмент, чадавхийг сайжруулах, багш, хүүхэд бүрийг хөгжүүлэх талаар анхаарч, 2018-2019 оны хичээлийн жилд “Боловсролын салбарын ажилтнуудын харилцан хандлагыг сайжруулж, олон нийтийн оролцоог өргөжүүлэн, хүүхэд бүрийн эх хэлний чадварыг хөгжүүлж, сурагч нэг бүрийн сурлагын чанарт ахиц гаргана” гэсэн зорилгыг дэвшүүлэн ажиллаж байна.