Замын-Үүд боомтод гурван сар саатаад байсан Эрдэнэтийн зэсийн баяжмалыг экспортлож эхэлжээ. Энэ талаар Шадар сайдын ажлын албанаас мэдээллээ. Ингэхдээ “Шадар сайдын ахлан ажиллаж байгаа Хилийн боомтын үйл ажиллагааг сайжруулах ажлын хэсгээс Гадаад харилцааны яамаар дамжуулан БНХАУ-тай бараа эргэлтийг нэмэгдүүлэх талаар хийх яриа хэлэлцээг эрчимжүүлж, удаа дараа хүсэлт тавьсан. Үүний дагуу өнөөдөр Эрээн хотын цар тахлаас урьдчилан сэргийлэх хянах шуурхай штабаас 90 дугаартай мэдэгдлийг гаргаж, энэ сарын 27-ны 00.00 цагаас эхлэн Эрээн төмөр замын боомтоор гурван сар гаруй хугацаанд Замын-Үүд боомтод саатаад байсан нүүрс, төмрийн хүдэр, зэсийн баяжмалыг шат дараатайгаар татан авах боломжтой болсноо мэдээллээ” гэв.