Алтанбулагийн чөлөөт бүсийн дарга Ч.Чимэдсүрэн дохиололтой машин унадаг юм байна. Түүний “унаж” явсан машиныгзамын цагдаа зогсоожээ. Ямар зөрчил гаргасан юм бүү мэд. Ямартай ч тэрээр машинаасаа бууж ирээд цагдаатай түлхэлцэн, хэрэлдэж байна.
Дарга нь ч пээдгэр юм, цагдаа нь ч омогтой юм. “Ийм машин уначихаад намайг дээрэлхэхгүй” шүү хэмээн том дуугарах цагдаагийн өөдөөс “Чи хэнтэй юу яриад байна” гэж чөлөөт бүсийн дарга “томорч” байгаа сонсдоно.
Ийм нэгэн бичлэг өчигдөр сошиал ертөнцөөр тарав. Хүмүүс янз бүрээр л сэтгэгдэл үлдээсэн байна.Дийлэнх нь цагдааг магтаж, маяактай машины даргыг зүхсэн байна.
Харин нэг хүн “Аль алинд нь бусдыг хүндэтгэх хүсэл алга байх шиг байна даа” хэмээн бичсэн нь үнэн санагдав. Тов тодорхой хууль, дүрэм байхад тэрдагуу тэд асуудлаа шийдээд хоёр биенээ хүндэтгэсэнгүй. Хэн хэндээ дийлдэхгүй давж гарах гэсэн монгол зангаасаа болоод хэрэлдээд салж байна. Энэ хоёрыг хэлэлтгүй монголчууд бид өөр хоорондоо ийм харилцаатай болчихжээ. Тиймээс хэрэлдсэн хоёрынхоо буруу, зөвийг шүүж цэцэрхэхээсээ илүү өөрөө өөрсдийгөө толинд харсан лугаа тусгаж авах хэрэгтэй юм болов уу.Олны дунд хазгай гишгэвэл сошиал ертөнцийн шившиг болгодог youtube хэмээх орчин үеийн “цагдаатай”болсныг марталгүй биеэ цэнэж, хэн хэндээ хүндэтгэлтэй хандаж сурцгаая.
Я.МӨНГӨНЦЭЦЭГ