СБД-ийн IV хорооны өндөр настан Ш.Батсүх
Улс, эх орноо хөгжүүлэх, ард түмнийхээ амьдрал ахуйг сайжруулахын төлөө хоёргүй сэтгэлээр хүчин зүтгэхээ андгайлж, сонгогч түмний саналыг авч УИХ-ын гишүүн болсон, төрийн түшээд маань гишүүнийхээ эрх үүргийг хэрхэн биелүүлж байгаадаа цаг ямагт дүгнэлт хийж ажиллаасай хэмээн бодогдоно. УИХ-ын гишүүн бол хууль дээдлэх, хууль журмыг цаг үеийн шаардлагатай уялдуулан боловсронгуй болгох санал санаачилга гаргах, намынхаа мөрийн хөтөлбөр, сонгуулиар сонсогчдод өгсөн амлалтаа хэрэгжүүлэхийн төлөө цөхрөлтгүй ажиллах, хуралдаатогтмол идэвхтэй оролцох үүрэгтэй билээ. Гэтэл одоогийн УИХ-ын хуралдааны ирцийг харахад нөгөө 76 гишүүн маань 60-80 орчим хувиас хэтрэхгүй ирцтэйгээр хуралдаж, оролцсон гишүүдийн 70-80 хувийн саналаар хэлэлцсэн асуудал батлагдаж байх жишээтэй. Тодруулж хэлбэл, нөгөө 76 гишүүн 70 хувийн ирцтэй хуралдахад 53 гишүүн оролцож, 23 гишүүн хуралдаа оролцоогүй гэсэн үг. Иймд хэн, хэн ямар шалтгаанаар оролцоогүйг мэдээлдэггүй байгаа нь цаанаа нэгэн учир шалтгаантай байдаг биз ээ. УИХ-ын гишүүд өөрсдийгөө хүндэтгэж, нэгэн жигд хувцасласан, цөм цагаан цамц зангиатай байвал аятайхан харагдана. Гэтэл зарим гишүүд зангиагүй, хоолой хэнхдэгээгаргачихсан, гараа эвхчихсэн, шанаагаа тулчихсан нэг л уйтгартай байдалтай сууж харагдах юм. Энэхүү байдал бусдад ямархан санагдахыг бодууштай юм. Бидний үр хүүхдүүд ЕБС-д суралцахдаа сурагчдын формоо өмсөөд, багшийгаа хичээл зааж байхад хоёр гараа зөрүүлж тавиад хичээлдээ анхааралтай нь аргагүй суудаг байтал аав, ээж, эмээ, өвөө болсон УИХ-ын гишүүд маань хуралдаа ямархан байдалтай оролцож байгааг жишээлээд бодоход илүүдэхгүй биз ээ. УИХ-ын Тамгын газраас чуулганы хуралдаанд оролцоогүй гишүүдийн шалтгааныг сандлынх нь түшлэгийн ар дээр бичиж тавьдаг болмоор санагдана.
Хэлэх эрхийн индэрт оролцон үзэл бодлоо илэрхийлэхийг хүсвэл 99650208 дугаарын утсаар холбоо барина уу.
Тэмдэглэл хөтөлсөн Э.МӨНХТҮВШИН