Оросын нэрт хөгжмийн зохиолч С.В.Рахманиновын нэрэмжит залуу төгөлдөр хуурчдын Олон улсын анхдугаар уралдаан энэ сарын 2-8-нд Москва хотноо боллоо.
Москва хотын Засгийн газар, ОХУ-ын Соёлын яамны дэмжлэгтэйгээр Гнесины нэрэмжит Оросын хөгжмийн академийн концертын их танхимд зохион байгуулсан анхдугаар уралдаанд АНУ, ИБУИНВУ, Сингапур, Монгол, БНХАУ, Болгар, БНСУ зэрэг 10 гаруй улс болон оросын өнцөг бүрээс ирсэн нийт 250 гаруй залуу төгөлдөр хуурч авьяас билэг, ур чадвараа сорин өрсөлдөв.
Уралдаанд оролцогсод 10 нас хүртэлх, 11-13 нас, 14-17 нас, 18-25 насны дөрвөн ангилалд өрсөлдөж шилдгүүдээ тодруулсанаас хамгийн бага насны буюу 10 хүртэлх насны ангилалд оролцсон Хөгжим бүжгийн их сургуулийн нэгдүгээр ангийн сурагч З.Аминэрдэнэ тусгай байрын шагнал хүртсэн байна. Тэрээр энэ ангилалд өрсөлдсөн хамгийн залуу төгөлдөр хуурч болсон аж. Мөн энэ насны ангилалд өрсөлдсөн Хөгжим бүжгийн их сургуулийн гуравдугаар ангийн сурагч О.Нандин III байрын шагнал хүртсэн бахдам амжилт үзүүлжээ.
Энэ жилийн уралдаан нь их хөгжмийн зохиолчийн мэндэлсэний 150 жилийн ойн хүрээнд болж байгаагаараа онцлогтой байв.