АНУ-ын эх газраас баруун өмнө зүгт, Номхон далайн төв хэсэгт орших газрын диваажин хэмээн нэрлэгддэг Хавай мужийн уулархаг бүс нутагт сүүлийн хэдэн өдөр их хэмжээний цас орж орсны улмаас цаг агаарын таагүй нөхцөл байдал үүсээд байна. Өнгөрөгч өдрүүдэд орсон цасны хэмжээ зарим газарт 90 см хүртэл байгаа юм.
Одоогийн байдлаар Хавай мужийн хамгийн өндөр оргилууд болох Мауна Кий болон Мауна Лоа оргилуудад хамгийн их хэмжээний цас ороод байгаа юм. Уг 2 оргил нь далайн түвшнээс дээш 4260 метрийн өндөрт оршдог, жилд дунджаар 5-6 удаа л цас ордог, орох цасны хэмжээ 40-60 орчим см байдаг байна. Гэтэл сүүлийн хэдхэн хоногт цас их хэмжээгээр орсны улмаас Мауна Лоад цасаар шуурч, тэнд байрлах Канад, Франц болон Хавайн сансрын бааз цасаар хучигджээ. Иймд мягмар гараг хүртэл хоёр оргил руу нэвтрэх замыг аюулгүй байдлын үүднээс хаасан байна.
Цаг уурын шинжээчдийн хэлж байгаагаар, халуун орны бүс нутагт цас орох нь ховор үзэгдлийн нэг, түүнчлэн ийм бага өндөрт маш их цас унасан нь ховор үзэгдэл болж байна хэмээн тайлбарлаж байна. Харин нутгийн бусад хэсэгт их бороо орсны улмаас жилийн турш зунаараа байдаг халуун оронд цаг агаар сэрүүсч нэмэх 20 хэмийн дулаантай байна. АНУ-ын үндэсний цаг уурын албанаас мэдээлж байгаагаар, Хавай мужид ирэх өдрүүдэд ч цаг агаарын таагүй үзэгдэл үргэлжлэх хандлагатай байгаа талаар мэдээлж байна.
