Шинэ жилийн эхний өдөр Хандгайтад гулгаж байсан хүү санамсаргүйгээр хүн дайрч аминд нь хүрсэн хэрэгт холбогдсон.
Чаргаар гулгаж байсан хүүд Эрүүгийн хуулийн 94-р зүйл ангиар эрүүгийн хэрэг үүсгэн, Сүхбаатар дүүргийн цагдаагийн хоёрдугаар хэлтэст шалгаж байсан билээ. Уг зүйлийн 94.1-д “Бусдыг болгоомжгүй алсан бол таван жил хүртэл хугацаагаар хорих ял шийтгэнэ” хэмээн заасан байдаг. Улмаар “Цагдаагийн байгууллагаас хуулийнхаа дагуу хүний амь насыг санамсаргүйгээр хохироосон гэсэн үндэслэлээр шалгалтын ажиллагаа хийнэ. Улмаар хэргийг прокурорын байгууллагад шилжүүлнэ. Харин ямар ял шийтгэл оноохыг шүүх, прокурорын байгууллага шийдвэрлэнэ” гэх хариулт өгч байсан юм.
Тиймээс бид энэ явдлаас хойш нэлээд хэдэн сар өнгөрсөн тул хэрэг нь хэрхэн шийдвэрлэгдсэн талаар албаны эх сурвалжаас тодруулахад хэргийг нь прокурорын газраас хэрэгсэхгүй болгосон гэсэн юм. Учрыг тодруулбал Сүхбаатар дүүргийн цагдаагийн газраас уг хэргийг Эрүүгийн хуулийн 27.1-т зааснаар “Гэмт хэрэг болгоомжгүй үйлдэх нь хөнгөмсгөөр найдсан, эсхүл хайхрамжгүй хандсан байна.” гэж заасан зүйл ангид хамаарах хэрэг гэдгийг нотолж, хэргийг нь прокурорт шилжүүлсэн байна.