Изралийн Хайфа хотын ойролцоо балар эртний агуйд 13 мянга жилийн настай шар айраг бүхий дэлхий дээрх хамгийн эртний шар айргийн үйлдвэрийг олсон талаар археологчид мэдээлжээ.
Тус олдворыг хагас нүүдэлчин анчдын булшыг судлах үед нээсэн аж. Үүнээс өмнө шар айргийг таван мянган жилийн тэртээгээс нэрж эхэлсэн гэж үзэж байсан бөгөөд Израилиас олдсон энэхүү нээлт түүхийг эргүүлнэ гэдэгт судлаачид итгэлтэй байгаа юм байна.
Түүнчлэн, эрдэмтэд бидний бодож байсан шиг шар аргийг зөвхөн талх хийх явцад гаргаж авсан бүтээгдэхүүн биш байх хэмээх таамаглалыг дэвшүүлжээ. Тэд аль анхдагч вэ гэдгийг одоогоор хэлж чадахгүй байгаагаа дурдсан байна. Мөн үхэгсдэд хүндэтгэл үзүүлэх зан үйлд ашигладаг байсан байж магадгүй хэмээн үзэж байгаа аж.
Судалгааны багийн ахлагч Стэнфорд их сургуулийн профессор Ли Лиугийн хэлснээр Палеолит, Неолитын үеийн хооронд амьдарч байсан Натуф хүмүүсийн хэрэглэдэг хүнсийг судлах явцад улаан буудай, арвай тарианаас гаргаж авсан согтууруулах ундааны ул мөрийг олсон. Эртний шар айраг нь өнөөдөр бидний хэрэглэж буй шар айргаас нилээн өөр, зутан мягийн өтгөн байсан хэмээжээ. Өнөө цагийг бодвол эрт цаг үед согтууруулах ундааг арай сул исгэдэг байсан байна.