Арваннэгдүгээр сарын 14-нд шилжих шөнө Францын нийслэл болон түүний дагуул хотод “Исламын улс” цуврал алан хядах ажиллагаа хийснийхээ дараа видео дүрс бичлэг бүхий анхааруулгыг нийтэлсэн тухай Ройтерс агентлаг мэдээлэв. Дүрс бичлэгт өгүүлэхдээ, “Франц бөмбөгдөлтөө зогсоохгүй бол бид халдлагаа зогсоохгүй” гэж мэдэгдсэн байна.
Прокурорын мэдээгээр, Парист хийсэн террорист довтолгооны хохирочдын тоо наад зах нь 128 хүн болж, 90 хүний биеийн байдлыг маш муу гэжээ. Франц улс Сирийн ерөнхийлөгч Ассадыг Москва шиг дэмждэггүй ч Ирак, Сирид “Исламын улс” бүлгийг бөмбөгддөг. Есдүгээр сарын 27-нд террористуудын лагерийг францчууд бөмбөгдсөний дараа ерөнхийлөгч Франсуа Олланд “Исламын улс” Францад занал хийж байна гэсэн юм. Аллагын хариуцлагыг “Исламын улс” гэх террорист бүлэглэл өөртөө авсан юм.