Монгол Улсын Хөдөлмөрийн баатар, Гавьяат тамирчин, Мэргэжлийн сумогийн 69 дэх их аварга Хакухо Шёо Мөнхбатын Даваажаргалын “Хөдөлмөрийн баатар” цолны найр, хүндэтгэлийн мялаалга наадам түүний төрөлх нутаг Төв аймгийн Зуунмод хотноо өчигдөр боллоо.
Наадмын дараа Shangri-La зочид буудалд хүндэтгэлийн хүлээн авалт боллоо. Энэ үеэр мэргэжлийн сумогийн 69 дэх их аварга Хакухо Шёо М.Даваажаргалын 20 дахь удаагийн түрүүгээ авахдаа өмсөж байсан бүсийг дуудлага худалдаагаар худалдаалжээ.
10 саяас дуудсан уг бүсийг 20 гаруй хүн сонирхож, үнэ хаялцуулсан байна. Харин тус бүсийг “Алтай констракшн”-ы Х.Бат-Эрдэнэ 110 сая төгрөгөөр үнэ цохин худалдан авчээ.