Ашигт малтмалын газраас нийт арван талбайд ус, газрын тос, байгалийн хий, цацраг идэвхт болон түгээмэл тархацтай ашигт малтмалаас бусад төрлийн ашигт малтмалын хайгуул хийх зөвшөөрөл авах сонгон шалгаруулалт зарлаад байгаа. Энэ дагуу өнгөрөгч даваа гаригт хайгуулын тусгай зөвшөөрөл хүссэн өргөдлийг бүртгэх ажлыг цахимаар авч эхэлсэн серверт нь алдаа гарсан байна. Тиймээс бүртгэлийг түр хугацаагаар зогсоод өнөөдрөөс ахиад эхлүүлж байна. Тодруулбал, серверийн алдааг шалгаж, дахин нягтлахын тулд өнөөдөр 11.00-11.05 цагийн хооронд таван минутын хугацаанд туршилтын журмаар Хайгуулын тусгай зөвшөөрөл хүссэн өргөдлийн дугаар олгох бүртгэл явуулахаар болсон байна. Туршилтын ажиллагаа тул мэдээллээ үнэн зөв бөглөхгүй байхыг АМГ-аас анхааруулжээ. Харин албан ёсны бүртгэл ирэх даваа гарагт явагдах юм.