Тайландын Бангкок хотноо Азийн аварга шалгаруулах боксын 18 дахь удаагийн тэмцээн болж өнгөрсөн билээ. Наймдугаар сарын 26-наас энэ сарын 5-ны өдрүүдэд болсон уг тэмцээнд манай улсаас есөн тамирчин оролцсон юм. Тэднээс Олон улсын хэмжээний мастер Б.Түвшинбат, Г.Ган-Эрдэнэ нар хүрэл медаль, 60 кг-д Д.Отгондалай алтан медаль хүртсэн.
ОУХМ Б.Түвшинбат тэмцээний мөнгөн медалийн төлөөх тоглолтод Казахстаны тамирчин, дэлхийн аварга Данияр Еоеуссиновыг гурван үеийн турш илүүрхэн тоглосон ч шүүгчид 1:2-оор эсрэг талд ялалт өгсөн нь нэлээд дуулиан дагуулсан юм. Гэтэл тоглолт дууссаны дараа Казахстаны дасгалжуулагч манай улсын баг тамирчид дээр ирж, Б.Түвшинбат болон дасгалжуулагч д.Батсүрэн нараас уучлалт гуйгаад өнгөрсөн гэнэ.