Казахстан улсад коронавирусийн халдвар авсан хүний тоо 100 мянгад хүрсэн байна. Үүнээс 74 мянган хүн бүрэн эдгэрч эмнэлгээс гарсан бол 1313 хүн вирусийн халдварын улмаас нас баржээ.
Тус улсад өнгөрсөн долдугаар сараас хойш коронавирусийн халдварын тархалт идэвхжсэн бөгөөд хамгийн их буюу нэг өдөрт 1962 шинэ тохиолдол долдугаар сарын 9-нд бүртгэгдэж байв. Үүнээс хойш долдугаар сарын турш шинэ тохиолдлын дундаж тоо 1000-1500 дотор хэлбэлзэж байсан юм. Харин наймдугаар сар гарснаас хойш шинэ тохиолдлын тоо аажим аажмаар буурч байгааг Казахстаны Эрүүл мэндийн яамнаас мэдээллээ.
Гэсэн хэдий ч энэ нь тайвширч болно гэсэн үг биш бөгөөд иргэд олон нийтийн газар амны хаалт зүүх, иргэд хоорондын зайг баримтлах, гараа сайтар угаах зөвлөмжийг дагаж мөрдөхийг сануулсаар байгаа юм.
Түүнчлэн манай улсын 1300 иргэн эх орондоо ирэх хүсэлт гаргасан бөгөөд үүнээс 200 иргэнээ татаж авсан байна.
Б.ОЮУНДАРЬ