Өнгөрсөн даваа гаригт Каталонийн
автономи парламент Испанийн бүрэлдэхүүнээс гарах тухай тогтоол гаргасан байна. Үүнтэй
холбогдуулан өчигдөр Испанийн Үндсэн хуулийн цэц уг тогтоолыг хэлэлцэж харин Ерөнхий
сайд Мариано Рахой Засгийн газраа яаралтай хуралдуулжээ. Каталониг тусгаар улс болгохыг
тууштай дэмжигч улстөрч Артур Мас үүнтэй холбогдуулан мэдэгдэл хийхдээ ямар ч шүүх,
ардчиллыг ашиглах гэсэн эрх баригчдын алхам хэдэн сая хүний хүсэл эрмэлзлийг үгүйсгэж
чадахгүй гэв. Каталониг тусгаар улс болгохыг дэмжигч улс төрийн хүчнүүд сонгуулийн
сурталчилгааны үеэр өгсөн амлалтаа биелүүлж, өрх тусгаарлах асуудлыг дахин хөндлөө.
Каталонийн автономит мужийн парламент уг асуудлыг хэлэлцэхэд 72 гишүүн дэмжиж,
63 нь татгалзсан. Ийнхүү тусгаар тогтнолыг баталсан байна. Энэ шийдвэр уг асуудлыг
дэмжигчдийн тоог нэмэгдэхэд нөлөөсөн. Ийм тогтоолыг гаргуулсан улс төрийн хүчин
Европт бас нэгэн шинэ улс ердөө 18 сарын дараа бий болно хэмээн мэдэгдсэн юм.
Каталонийн парламентаас тогтоол
гаргасны дараа улстөрч Армур Мас хэвлэлүүдэд ярилцлага өгөхдөө Испанийн эрх баригчид
уг асуудлаар хэлэлцээ хийхээс зайлсхийж байна хэмээн шүүмжилсэн. Ерөнхий сайд Мариано
Рахой автономит мужийн төлөөлөгчидтэй уулзахаас зайлсхийгээд зогсохгүй хууль сахиулах
байгууллагад хандсаныг буруутгав. Испанийн эрх баригчид үүнээс өөр шийдвэр гаргаж
чадахгүй гэдгийг мэдэж байсан гээд ардчилсан маягаар өөрийнхөө үзэл бодлыг илэрхийлж
байгаа хүмүүсийг хуулийн байгууллагад өгснийг буруутгав. Каталоничууд тусгаар улс
байгуулах бүрэн эрхтэй гэдгийг ч тэрээр дурдсан байна.
Испанийн Ерөнхий сайд Каталониг
тусгаарлах асуудлыг эрс эсэргүүцэж ямар ч тогтоол гаргасан асуудлыг шийдэхгүй гээд
Засгийн газар Үндсэн хуулийн цэцэд хандана гэжээ. Каталоничууд өмнө нь нэг бус удаа
Испаниас өрх тусгаарлана хэмээн мэдэгдэж байсан боловч зорилгодоо хүрч чадаагүй.
Тус улсын Үндсэн хуульд улс орныхоо бүрэн бүтэн байдлыг баталгаажуулна хэмээн заасан
байдаг гэнэ. Уг хуулийн 155 дугаар зүйлд зааснаар Каталонийн автономит эрхийг болиулж
болно гэж заажээ.
Испанийн Засгийн газар уг асуудлаар
Үндсэн хуулийн цэцэд хандахад бараг автоматаар тусгаар тогтнолыг болиулна. Гэтэл
тус автономит мужийн парламентаас гаргасан тогтоолд эрх баригчдын шийдвэрийг хүлээн
авахгүй хэмээн заасан байна. Өөрөөр хэлбэл, Үндсэн хуулийн цэцийн шийдвэр хамаагүй
бөгөөд 30 хоногийн дотор шинээр байгуулагдах улсын Үндсэн хууль, нийгмийн аюулгүй
байдал болон Сангийн яамыг байгуулах төслүүдийг бэлэн болгоно хэмээн заажээ. Европт
Каталонийн бүгд найрамдах улс байгуулагдах эсэх нь тун удахгүй тодорхой болох байх.