Монгол Улсын хөдөлмөрийн баатар, дэлхийн аварга Х.Цагаанбаатар энэ жилийн Дэлхийн аварга шалгаруулах тэмцээний дараа жудо бөхийн спортын тамирчны замналаа орхисноо мэдэгдсэн билээ. Тэрбээр зодог тайлж, дасгалжуулагч болохоор Үндэсний шигшээ багт ажиллаж эхэлсэн. Тэгвэл Хөдөлмөрийн баатар маань хэдийгээр жудогоо орхисон ч самбо бөхөд хүч үзэхээр болжээ. Марокко улсын Касабланка хотноо энэ сарын 13-15-ны өдрүүдэд самбо бөхийн дэлхийн аварга шалгаруулах тэмцээн болно. Тус тэмцээнд оролцох Монгол Улсын баг тамирчид өчигдөр эх орноосоо морджээ. Улсаа төлөөлөн ДАШТ-д хүч үзэх багийн бүрэлдэхүүний 74 кг-ын жинд Х.Цагаанбаатар Женко клубээ төлөөлөн барилдахаар мордсон байна.