Жолооны үнэмлэхийг цахимаар захиалах ажлыг үе шаттай хэрэгжүүлж байгаа талаар ЦЕГ-ын Бүртгэл, хяналтын төвөөс мэдээлж байна.
Энэ ажлыг Улсын бүртгэлийн ерөнхий газартай хамтран хийж буй аж. Харин жолооны үнэмлэх хэвлэн гарах ажил саатаж оочер дугаар ихтэй байгаа талаар тодруулахад, өнгөрсөн оны аравдугаар сараас хойш хагас жилийн хугацаанд хэвлэлийн бэлдэц тасарсан шалтгаанаар жолооны үнэмлэх хэвлэх ажил саатаж түр үнэмлэх олгож байсан. Тэгвэл өнөөдрийн байдлаар тээврийн хэрэгсэл жолоодох эрхийн үнэмлэх хэвлэх ажил хэвийн үргэлжилж байгаа талаар ЦЕГ-ын бүртгэл, хяналтын төвөөс мэдээлж байна.
Өнгөрсөн онд худалдан авах ажиллагаанаас шалтгаалаад жолооны үнэмлэхний хэвлэх бэлдэц, дагалдах хор, хэрэгсэл худалдан авах байдал доголджээ. Энэ оны гуравдугаар сараас бэлдэц болон дагалдах хор, хэрэгслийг бүрэн нийлүүлж эхэлснээр одоогийн байдлаар хүлээгдэж байсан үнэмлэхүүдийг 100 хувь хэвлэн тарааж байгаа аж.
Жолооны үнэмлэх хэвлэх бэлдэц болон хэвлэх машины хор худалдан авахад жилд дунджаар 1.3-1.8 тэрбум төгрөг зарцуулдаг байна. Жил бүр 50 мянга орчим иргэн жолоодох эрхийн үнэмлэх шинээр авдаг бол мөн 40 мянга орчим иргэн хаяж гээгдүүлсэн үнэмлэхээ нөхөн захиалдаг байна. Одоо ЦЕГ-ын Бүртгэл, хяналтын төвөөс иргэдэд жолооны үнэмлэхийг олгож байна. Харин аймаг, орон нутагт жолоодох эрхийн үнэмлэхийг “Монгол шуудан” компани, аймгуудын Тээврийн цагдаагийн тасаг, нийслэлд “Дүнжингарав” болон “Драгон” төв, бүртгэл, хяналтын төвөөс түгээж байна.