Сөүл-Улаанбаатар болон Берлин-Улаанбаатарын чиглэлийн онгоцоор зорчиж ирсэн гурван иргэний шинжилгээний хариу эерэг гарсан. Энэ талаарх мэдээллийг зарим хэвлэл мэдээллийн хэрэгслээр шуурхай мэдээлэлж олонд хүргэсэнд ХӨСҮТ –ийн зүгээс дургүйцлээ илэрхийлж, зөвхөн өдөр бүрийн 11:00 цагт Эрүүл мэндийн яамнаас зарлах хурлаас үнэн бодитой мэдээлэл авч байхыг уриалаад байгаа.
Бид энэ талаар МУБИС-ийн Нийгэм, хүмүүнлэгийн сургуулийн захирал, доктор, профессор Ж.Батбаатараас тодруулга авлаа.
-Манай улсын гурван иргэн “Ковид 19”-ийн халдвар авсныг хэвлэл мэдээллийн зарим байгууллагууд шуурхай мэдээлсэнд Халдварт өвчин судлалын үндэсний төв шүүмжлэлтэй хандаж, хариуцлага хүлээлгэх хэрэгтэй гэх байр суурийг илэрхийллээ. Энэ талаар та ямар байр суурьтай байна вэ?
-Хэвлэл мэдээлэл бодит мэдээ, мэдээллийг цаг алдалгүй түргэн шуурхай олж хэрэглэгчдэд хүргэх үүрэг хүлээсэн, ийм үйлчилгээ үзүүлдэг байгууллага. Түрүүлж олж түргэн шуурхай мэдээлж байгаа нь буруу, зарчимгүй зүйл биш. Харин тухайн мэдээлэл үнэн бодитой байх ёстой. Бүх мэдээллийн хэрэгслүүд мэдээллийг ганцхан сувгаас авч олонд хүргэх нь зөв зүйл биш. Ер нь чөлөөт хэвлэл гэдэг өөрөө худал ташаа мэдээлэл олонд хүргэвэл мэдээллийнхээ төлөө, үйлчилгээнийхээ чанарын төлөө хариуцлага хүлээдэг субьект шүү дээ. Ямар мэдээлэл хор хөнөөлтэй, ямар мэдээлэл байж болох, болохгүй вэ гэдгийг мэдээлэл харилцааны салбарын байгууллагын мэргэжлийн байгууллагын хувьд редакц өөрөө хариуцлага хүлээж байдаг. Өөрөөрөө мэдээллээ олж магадлан шалгаж баталгаажуулаад, мэдээлэх нь сэтгүүл зүйн хэвийн үйл ажиллагаа.
-Өндөржүүлсэн бэлэн байдал зарласан, хөл хорио тогтоосон үед нийгмийн сэтгэл зүйг үймүүллээ гэх хандлага байна лээ. Энэ талаар?
-Онц байдал зарлаагүй байна шүү дээ. Өндөржүүлсэн бэлэн байдалд ажиллаж байна. Харин онц байдал зарласан үед бол өөр. Онц байдал зарласан нөхцөлд тогтоосон хууль, дүрмийг дагаж биелүүлэх үүрэгтэй байдаг. Энэ бол нөхцөл өөр. Онц байдал зарлаагүй байна” гэсэн юм.