ИЗНН-ыг Сонгуулийн ерөнхий хороо бүртгэхээс татгалзаад байгаа билээ. Ингэхдээ Сонгуулийн тухай хуулийн 121.2, 124.3.2 дахь заалтуудыг үндэслэсэн байна. Энэ шийдвэртэй холбогдуулан ИЗНН-аас дөнгөж сая хэвлэлийн хурал хийлээ. Тус намын дарга Ч.Ганхуяг хэлэхдээ “Сонгуулийн ерөнхий хороог Сонгуулийн тухай хуулийн 111.4.2-т заасны дагуу Захиргааны хэргийн шүүхэд нэхэмжлэл гаргахаар болсон. Бид СЕХ-ны энэ шийдвэрийг түдгэлзүүлэхээр ажиллана. Нэр дэвших үйл ажиллагаанаас өмнө шүүхийн шийдвэр гарвал манай нам сонгуульд орох боломжтой болно. Ардчилсан намтай нэгдэнэ гэж байсан нь манай намын ярьж байсан нэг л хувилбар, манай нам дангаараа сонгуульд орох ёстой. Сонгуулийн ерөнхий хороо энэ тогтоолоо тавдугаар сарын 02-ны өдөр гаргасан мөртлөө өнөөдөр өглөө бидэнд шийдвэрийг хүлээлгэж өгсөн. Ингэж зөрчлөө арилгах бололцоо олголгүй цагийг нь тулгаж байна” гэж байв.