УИХ-ын Дэгийн тухай хуульд зааснаар намрын чуулганыг жил бүрийн аравдугаар сарын 1-нд нээдэг. Намрын чуулганыг нээх өдөр ням гаригт таарч байгаа тул УИХ-ын намрын чуулганыг Ирэх сарын 2 буюу Даваа гаригт нээхээр болжээ.
Намрын чуулганаар хэлэлцэх асуудлын хамгийн эхэнд Монгол Улсын 30 дахь Ерөнхий сайдыг томилох, Засгийн газрын бүтэц, бүрэлдэхүүнийг батлах асуудал багтсан. Эрх барьж буй Монгол ардын нам шинэ Ерөнхий сайдаа ирэх даваа гаригт болох Бага хурлаараа тодруулах юм.
Чуулганы эхэнд мөн Монгол Улсын 2017 оны төсвийн тодотголыг хэлэлцэх, Монгол Улсын 2018 оны төсвийн тухай хууль, Төрөөс 2018 онд баримтлах Мөнгөний бодлого зэрэг томоохон хуулиудыг хэлэлцэнэ.