УИХ-ын Эдийн засгийн байнгын хороо 2018 оны намрын ээлжит чуулганы хугацаанд давхардсан тоогоор 20 орчим асуудал хэлэлцсэн байна.
Тухайлбал, Төрөөс мөнгөний бодлогын талаар 2019 онд баримтлах үндсэн чиглэлийг тодорхойлох, Жижиг, дунд үйлдвэр, үйлчилгээг дэмжих тухай, Хэмжил зүйн тухай, Ашигт малтмалын тухай, Харилцаа холбооны тухай, 2019 оны төсвийн тухай хуулийн төслийн талаар санал, дүгнэлт гаргаж хэлэлцүүлэх, зарим салбарын сайд нарыг томилох, чөлөөлөх зэрэг асуудлыг хэлэлцжээ. Эдгээр асуудлаар 18 санал дүгнэлт, танилцуулга бэлтгэн, УИХ-ын нэгдсэн хуралдаанаар хэлэлцүүлэн шийдвэрлүүлсний зэрэгцээ хуулийн төслүүдийг хэлэлцүүлэгт бэлтгэх ажлын 9 хэсэг байгуулсан байна.
Мөн 5 тогтоолыг эцэслэн батлаж, Олон улсын 1 гэрээ, хэлэлцээрийн төслийг зөвшилцжээ. Тухайлбал, Валютын ханш, бензин, шатахууны үнэ болон “Ипотекийн зээлийн хөтөлбөрийг хэрэгжүүлэх талаар чиглэл өгөх тухай” байнгын хорооны шийдвэр батлаж, Засгийн газар, Монголбанкинд чиглэл өгөв.
Санхүүгийн зах зээлийн зөвлөл болон Олон улсын аудитын компани “Прайсуотерхаус Куперс аудит ХХК” (PWC)-тай хамтран “Мөнгө угаах, терроризмыг санхүүжүүлэхтэй тэмцэх орчныг сайжруулах чиглэлээр хийж байгаа алхмууд, цаашид авч хэрэгжүүлэх арга хэмжээ”, “Макро эдийн засгийн бодлогын шинэ хандлагууд” сэдэвт хэлэлцүүлэг хийжээ.
Байнгын хороонд хандаж Төрийн болон бусад байгууллага, хуулийн этгээд, иргэдээс нийт 100 гаруй албан бичиг ирүүлснийг тухай бүрт нь шийдвэрлэн, хариуг хүргүүлжээ.