“Их долоо”-гийн дээд хэмжээний уулзалтыг зургадугаар сарын 11-13-нд Английн баруун өмнөд нутаг буюу Корнуоллын хойг дахь Карбис-Бэй хотхонд зохион байгуулахаар болжээ. Энэхүү уулзалтыг сүүлийн хоёр жилийн хугацаанд анх удаа биечлэн зохион байгуулах гэж буй нь энэ аж. Өнгөрсөн ням гаригт Их Британийн ерөнхий сайд Б.Жонсоны Тамгын газраас албан ёсоор энэ тухай мэдэгдэв. Энэ удаагийн уулзалтад Их Британи, ХБНГУ, Итали, Канад, АНУ, Франц, Япон, Европын холбооноос төлөөллүүд байлцахаас гадна Австрали, Энэтхэг, БНСУ-ыг зочны хувиар оролцохыг уриад буй юм. Их Британи хурлыг даргалах агаад тус улсын Засгийн газраас гаргасан хамтарсан мэдэгдэлд коронавируст цар тахал, уур амьсгалын өөрчлөлт зэрэг олон улсад тулгамдаж буй асуудлаас гадна технологийн дэвшлийн давуу байдал, шинжлэх ухааны нээлтүүд зэрэг өргөн хүрээний сэдвээр талууд хэлэлцэх төлөвтэй байна.
Д.ЦЭРЭНДОЛГОР