“Их 20”-ийн дээд хэмжээний чуулга уулзалтад оролцож буй төрийн тэргүүнүүд Парист болсон террорист халдлагад өртөж амь үрэгдэгсдийн гэгээн дурсгалыг хүндэтгэж, нэг минут чимээгүй зогсон эмгэнэл илэрхийлэв. Мөн тэд “Исламын улс” бүлэглэлийн эсрэг цэргийн ажиллагааг эрчимжүүлэх талаар санал нэгдсэн талаар “The Guardian” уламжилжээ.
Тус чуулга уулзалтыг даргалж буй Туркийн Ерөнхийлөгч Тайип Эрдоан “Францад болсон халдлага талууд хүчээ нэгтгэж, “Исламын улс”-ын эсрэг цэргийн ажиллагаанд анхаарах цаг ирснийг батлан харууллаа” хэмээн онцолжээ. Мөн тэрбээр “Бид хүний амь насыг үргэлж бодолцох ёстой. Өнгөрсөн дөрвөн сарын хугацаанд Туркт ч мөн террорист халдлага болж, олон зуун хүний амь үрэгдсэн. Парисын халдлага Сирийн тулаанаас үүдэлтэй. Энэ бүх алан хядах ажиллагаа нь энх тайван, аюулгүй байдалд аюул занал учруулж байгаагийн баталгаа” хэмээжээ.