Харилцаа холбоо, мэдээллийн технологийн салбарын “ICT-Expo-2017” үзэсгэлэн энэ жил 11 дэх удаагаа болж байгаа юм. Харилцаа холбооны зохицуулах хорооноос зохион байгуулагдаж буй тус үзэсгэлэн энэ сарын 15-17-ны өдрүүдэд Д.Сүхбаатарын талбайд үргэлжилж байна. Уг арга хэмжээнд төр, хувийн хэвшлийн 60 орчим байгууллага оролцож байгаа аж. Үзэсгэлэнд оролцогч байгууллагууд зургаан номинацид бүтээгдэхүүн, үйлчилгээгээ өрсөлдүүлэх гэнэ.
Үүнд Шилдэг технологи, Шилдэг үйлчилгээ, Шилдэг санаачилга, Шилдэг бүтээгдэхүүн, Шилдэг шийдэл болон “ICT-Expo-2017” үзэсгэлэнгийн шилдэг оролцогчийг шалгаруулах юм байна. Экспо өнөөдөр хоёр дахь өдрөө үргэлжилж байгаа. Энэ өдөр хөгжлийн бэрхшээлтэй иргэдэд зориулсан лавлах тусгай дугаарын нээлтийг хийсэн.
Мөн Харилцаа холбоо, мэдээллийн технологийн газраас санаачлан хэрэгжүүлж буй “Цахим орчинд хүүхдийг хамгаалъя” аяныг эхлүүлэх аж. Ивээн тэтгэгч болон оролцогч байгууллагуудын зохион байгуулах уралдаан тэмцээн гээд олон арга хэмжээ энэ өдрүүдэд явагдаж байв. Амралтын өдөр учраас залуучууд төрөл бүрийн арга хэмжээнд оролцож байлаа. Мөн цахим спортын улсын аварга шалгаруулах тэмцээн, Автомат Роботын улсын аварга шалгаруулах уралдаан болж байлаа.
Үзэсгэлэнгийн үеэр Үндэсний дата төвөөс ТҮЦ машиныг ажиллуулж зарим лавлагааг иргэдэд үнэ төлбөргүй олгож байв.