БНСУ-ын автомашин үйлдвэрлэгч “Hyundai Motor” компани ирээдүйн техник хэрэгслүүдийн ханган нийлүүлэгч болох зорилтын хүрээнд Сарыг судлах аппарат бүтээнэ гэдгээ мэдэгджээ.Өнгөрсөн оны долоодугаар сард “Hyundai” Солонгосын сансар судлалын хүрээлэн, Солонгосын автомашины технологийн хүрээлэн зэрэг зургаан судалгааны хүрээлэнтэй уг төслийн талаар харилцан ойлголцлын санамж бичигт гарын үсэг зурсан гэж уг мэдэгдэлд дурдсан байна.
“Hyundai” болон дээр дурдсан хүрээлэнгүүдийн мэргэжилтнүүд судалгааны аппаратаа Сарны өмнөд туйлд амжилттай газардуулсны дараа эрдэс бодис цуглуулж, хүрээлэн буй орчны шинжилгээ хийн бусад шинжлэх ухааны төслүүдийг хэрэгжүүлэхийг зорьж байгаа аж.БНСУ-ын автомашин үйлдвэрлэгч тус компани 70 кг жинтэй, сарнаа явагчийнхаа концепт зургийг өнөөдөр олон нийтэд танилцуулжээ. “Hyundai” судалгааны аппаратаа ирэх оны хоёрдугаар хагаст хийж дуусгахаар төлөвлөж байна. Улмаар эцсийн хувилбарыг 2027 онд танилцуулах зорилт тавьжээ.
Г.АМАРСАНАА