Үл мэдэгдэх этгээдүүд Германы Хамбург хотын мэдээллийн “Хамбург Моргенпост” сонины редакцид халдаж, галдан шатаажээ. Исламистууд Парист цуст алан хядах ажиллагаа зохион байгуулсаныг эсэргүүцэж тус сонины эрхлэгч исламын зөнч Мухаммедыг шоглосон зургуудыг “Шарли Эбдо”-д хэвлэгдсэнээс авч нийтэлсэн байна. Гамбургийн цагдаа нар энэ хэргийг үйлдсэн байж болзошгүй хоёр этгээдийг халуун мөрөөр нь орж баривчилжээ. Одоогийн байдлаар мөрдөн байцаалтын ажиллагаа явагдаж буй юм байна.
АНУ-ын тусгай албанаас Европ, Америк дахь исламистууд хэд хэдэн террорист үйл ажиллагаа зохион байгуулахаар бэлтгэж буйг анхааруулж байсныг тэмдэглэх нь зүйтэй гэж хэвлэлд мэдээлжээ. Орон нутгийн хэвлэлд мэдээлэхдээ, шөнийн 02 цагийн орчим үл мэдэгдэх этгээдүүд сонины байранд халдаж, цонхоор нь хэд хэдэн шилтэй тэсрэх бодис бүхий шингэн буюу “Молотовын коктейл” шидэж галдан шатаасан гэсэн байна.
Халдлага болох үеэр азаар сонины байранд нэг ч сэтгүүлч, ажилтан байгаагүй аж. Харамсалтай нь сонины баримт бичгүүд галд өртжээ. Энэ нь “Шарли Эбдо”-д халдлага үйлдсэнтэй холбоотой байхыг албаныхан үгүйсгээгүй байна. Юуны учир галдан шатаасан шалтгаан одоогоор тодорхой болоогүй байгаа аж. Цагдаагийнхан энэ хэргийг лалын шашинтнууд үйлдсэн эсэх талаар баттай зүйл хэлээгүй байна.
