“Газарзүйн боловсрол-багшийн оролцоо” сэдэвт форум боллоо. Форумаар газар зүйн боловсролын чиг хандлага,өнөөгийн сургалтын байдал, багшийн хөгжлийн талаарх асуудлыг их дээд сургууль, ШУ-ны байгууллага, ЕБС-ийн багш нарын дунд хэлэлцэнэ. Байгаль орчинтой холбоотой дэлхийн дулаарал, уур амьсгалын өөрчлөлт эдгээрийн уялдаа холбоог ойлгож, дасан зохицох асуудлыг шийдвэрлэхэд газарзүйн шинжлэх ухаан чухал хэмээн форумд оролцогчид онцлов.
Форумын талаар МУИС-ийн Газар зүй тэнхмийн эрхлэгч В.Батцэнгэлээс тодрууллаа.
– 2009 оноос хойш ЕБС–ийн газар зүйн хичээлийн цагийг хассан шийдвэр гарсан. Энэ нь сурагчдын газар зүйн мэдлэгт нөлөөлөх үү?
Хүн бүхэн ЕБС-иар боловсрол эзэмшдэг. Тэр дундаа газар зүйн хичээлийн боловсролыг олгох нь хамгийн чухал асуудал. Бүх төрлийн мэргэжлийг эзэмшихэд газар зүйн мэдлэг шаардлагатай. Сүүлийн жилүүдэд ЕБС-ийн газарзүйн хичээлийн цаг багассан. Үүнтэй холбоотой хүүхдүүд улс орны газар зүйн талаар дутуу мэдлэг эзэмшсэн. Ирээдүйд сөрөг үр дагавар нь гарна. Насанд хүрсэн хойно эх орон дэлхий нийтийн үйл явдлыг таниулах нь амар биш. Тиймээс хүүхдүүдийг багаас нь эх орныг нь таниулж, байгаль дэлхийгээ хайрлаж сурахад газар зүйн хичээл их нөлөөтэй.
– Энэ шийдвэр газар зүйн багш мэргэжлийг сонгож буй оюутнуудад нөлөөсөн үү?
ЕБС-ийн газар зүйн хичээлийн цаг багассанаар заах багш нарын орон тоо ч багассан. Мөн ажлын байр хомсдож, оюутны тоо ч цөөрч байгаа. Тэгэхээр бэлтгэж буй мэргэжилтний тоог зохицуулах шаардлагатай.Гэхдээ багшийн мэргэжлээр суралцах оюутнуудад хөнгөлөлт үзүүлэх эерэг хандлага байгаа. Харин цаашдаа хуучин заасан үндсэн агуулгаа заах боломжгүй учраас энэ талын мэдлэг сурагчдад дутуу олгогдож байна гэлээ.
47–р сургуулийн Газар зүйн хичээлийн зөвлөх багш Ч.Батням хэлэхдээ “Газарзүйн боловсрол бүх мэргэжилтэй холбоотой учраас хамгийн чухал гэж үзэж байна. Та бүхний сэтгүүлч мэргэжилтэй холбовол цагийн хүрд нэвтрүүлэгийн ард эргэлддэг дэлхийн бөмбөрцөгийг зөв эргүүлчихсэн олон телевиз байдаг. Уг нь дэлхий буруу эргэдэг шүү дээ. Тэгээд телевиз рүү утасдаад хэлэхээр манай программ ингээд хийчихсэн гэдэг. Үүнийг программ хийдэг хүмүүс ч мэдэхгүй байна. Тэгвэл телевиз үзэж буй сурагчид ямар боловсрол эзэмших вэ? Дэлхий нар зөв эргэдэг юм байна гээд ойлгочихно. Сургууль дээр багш заахдаа дэлхий нар буруу эргэдэг гэж хэлдэг. Би энэ тал дээр их санаа зовдог шүү. Газар зүйн хичээлийг бүх их дээд сургуульд оруулах хэрэгтэй” гэв.