Засгийн газрын хэрэгжүүлэгч агентлаг Газрын харилцаа, геодези, зурагзүйн газар нь 21 аймаг, 330 сумын нутаг дэвсгэрт үнэ төлбөргүйгээр газар өмчилсөн иргэний бүртгэлийг нэгтгэж, мэдээллийн нэгдсэн сан байгуулжээ. Энэхүү мэдээллийн сангийн үйл ажиллагаа ирэх сарын нэгнээс албан ёсоор эхэлнэ. Мэдээллийн сангийн төв сервер нь Газрын харилцаа, геодези, зурагзүйн газарт байрлаж, нийслэлийн Өмчийн харилцааны газар, есөн дүүргийн Өмч, газрын харилцааны алба, 21 аймгийн ГХБХБГ, 330 сумын газрын даамал интернет сүлжээгээр холбогдож ажиллана. Мэдээллийн сан ашиглалтад орсноор иргэд заавал орон нутгаасаа газар өмчлөлийн тодорхойлолт авах шаардлагагүй болно. Өөрөөр хэлбэл мэдээллийн нэгдсэн санг ашиглан, хүссэн аймаг, сумаас тодорхойлолт гаргуулах боломж бүрдэх аж.
Монгол Улсын хэмжээнд 2014 оны хагас жилийн байдлаар 382 802 иргэн гэр бүлийн хэрэгцээ болон аж ахуйн зориулалтаар газар өмчлөн авчээ. Ингэснээр газар өмчлөл улсын хэмжээнд 13.3 хувьтай явагдаж байгаа аж.