Гаитигийн парламентын дээд танхим сенатын дарга Жозеф Ламберийг улсынхаа түр ерөнхийлөгчөөр зарлажээ.
“Шинээр сонгогдсон түр ерөнхийлөгч Жозеф Ламберын тангараг өргөх ёслолд төрийн албан хаагчид, иргэний нийгмийн удирдагчид оролцоно. Жозеф Ламбер Хаити улсын түр ерөнхийлөгчийн үүргийг 2022 оны хоёрдугаар сарын 7-нд сонгогдсон ерөнхийлөгч үүрэгт ажилдаа орох хүртэл гүйцэтгэх болно” хэмээн Сенатын тогтоолд дурдсан байна.
Ийм шийдвэр гаргахыг сенатын 9 гишүүний 8 нь дэмжжээ.
Гаити улсын Ерөнхийлөгч Жовенель Моиз мягмар гаргаас лхагва гаригт шилжих шөнө нийслэл хот дахь гэртээ үл таних этгээдүүдийн халдлагад өртөж амиа алдсан юм. Халдлагын үеэр тус улсын тэргүүн хатагтай Мартин Моиз мөн шархдаж, эмнэлэгт хүргэгдсэн. Гаитигийн Ерөнхий сайдын үүрэг гүйцэтгэгч Клод Жозефийн мэдэгдсэнээр, гэмт хэрэгтнүүдийн зарим нь англи, испаниар ярьж байсан байна. Жозеф ард иргэддээ тайван байхыг уриалаад “Гаитигийн Үндэсний цагдаагийн газар болон Зэвсэгт хүчин улс орны аюулгүй байдлыг хангаж байгаа” гэж мэдэгджээ. Үүнээс гадна Жовенель Моизийн амь насыг хөнөөсөн хөлсний цэргүүдийн дор хаяж 26 нь Колумбын иргэд байсан талаар тус улсын цагдаагийн газрын дарга Леон Шарль мөн мэдээлсэн юм. Гаитигийн сайд нарын зөвлөл тус улсад 15 хоногийн хугацаатай дайны байдал зарласан байна.
Гаитид ерөнхийлөгчийн болон парламентын сонгууль есдүгээр сарын 26-нд болох аж.