Эрүүл мэнд, спортын сайд асан Г.Шийлэгдамба нарт холбогдох авилгын хэргийг шүүх хурал өнгөрсөн оны VIII сарын 03-нд Сүхбаатар дүүргийн эрүүгийн хэргийн анхан шатны шүүхэд болсон билээ. Шүүхээс Г.Шийлэгдамбад нэг сая төгрөгийн эд хөрөнгийг хурааж, таван жил нэг сарын хорих ял, Г.Ганчимэгт Төрийн захиргааны албан тушаалд ажиллах эрхийг нэг жилийн хугацаагаар хасч, гэмт хэрэг үйлдэгдэх үеийн хөдөлмөрийн хөлсний доод хэмжээ болох 192,000 төгрөгийг 100 дахин нэмэгдүүлсэнтэй тэмцэх хэмжээний буюу 19,200,000 төгрөгийн торгох ял, О.Даваасүрэнд Нийтийн албанд томилогдох эрхийг 2 жилийн хугацаагаар хасч 1 жил 6 сарын хугацаагаар хорих ял, Э.Гантулгад 14,000 нэгжтэй тэнцэх хэмжээний буюу 14.000.000 төгрөгийн торгох ялыг тус тус оноосон. Харин 2017 оны 11-р сарын 02-нд болсон давж заалдах шатны шүүх хурлаар анхан шатны шүүхээс гаргасан дээрх шийдвэрийг хэвээр үлдээсэн байдаг. Тэгвэл өнөөдөр тэдэнд холбогдох авлигын хэргийг Дээд шүүхээр хэлэлцэж байгаа бөгөөд шүүх хурал 14 цагт эхэлж, өнөөдөр шийдвэрээ гаргах бололтой. Г.Шийлэгдамбыг Эрүүгийн хуулийн тусгай ангийн 268 дугаар зүйлийн 268.2, Г.Ганчимэгийг мөн хуулийн тусгай ангийн 268 дугаар зүйлийн 268.2, 269 дүгээр зүйлийн 269.1-т заасан гэмт хэрэгт тус тус яллагдагчаар татсан. Тэрбээр албан өрөөндөө бусдаас 500 сая төгрөгийн хахууль авч байгаад үйлдэл дээрээ АТГ-ын байцаагчдад баригдаж байсан юм.