Г.Доржзодов гэх залуу МАН-ын дарга М.Энхболд, А.Ганбаатар, Ц.Сандуй нарын төрийн албыг мөнгөөр зарж, 60 тэрбум төгрөг хэрхэн босгох талаар хоорондоо ярьж байгаа бичлэгийг 2016 оны УИХ-ын сонгуулийн өмнө олон нийтэд дэлгэн тавьсан. Уг бичлэг олон нийтийн сүлжээнд тавигдсанаас хойш Монголын нэр нөлөө бүхий хүмүүс Г.Доржзодовыг хэрхэн дарамталж байсан, амь нас, гэр бүлд нь ямар дарамт шахалт бий болоод байгаа, хууль хяналтын байгууллага хэрхэн шалгаж байгаа талаар манай сонин өмнөх дугаартаа хүргэсэн.
Харин яг одоо түүнийг баривчлахаар Оргил хотхон дахь гэрийнх нь гадаа цагдаагийн албан хаагчид очсон байна. Г.Доржзодовын байрны гадуур цагдаа нар бүсэлсэн байдалтай байгаа аж. Тэрээр тус байранд нуугдаж байсан гэх мэдээлэл байгаа юм. Г.Доржзодовын өмгөөлөгч тус байрны гадаа ирсэн ч “Баривчлах ажиллагаа яваагүй тул оруулах шаардлагагүй” гэсэн тайлбар тавин, оруулахаас татгалзсан байна.
Цагдаа нар түүнийг баривчлах гээгүй, хамгаалалтад авч байна гэж тайлбарлаж байгаа боловч Г.Доржзодов өөрийн цахим хаягаар дамжуулан би ямар ч хамгаалалт хүсээгүй, баривчлахыг завдаж байна гэх зүйлийг бичжээ.