Оффшорын эсрэг цуглаан өнөөдөр Сүхбатаарын талбай дээр боллоо. Энэхүү жагсаалыг өмнө нь Олон улсын эмэгтэйчүүдийн эрхийн өдөр хагас нүцгэлэн жагссан Б.Болор-Эрдэнэ тэргүүтэй эмэгтэйчүүд зохион байгуулав. Өнөөдрийн жагсаалд ирээдүйн үр хүүхдийнхээ төлөө ээжүүд монгол дээлтэйгээ оролцлоо.
Цуглаанд Ахмадын холбооны Г.Баасан оролцож үг хэллээ. Тэрээр, “Хүн болгон 14 сая төгрөгийн өртэй болчихоод байна. Гурван саяулаа оффшорчдыг гишгэх газаргүй болгоё. Бидний хайран сайхан улс маань шаахайн мөрөөр дүүрлээ. Монголчууд тогоотой хоолондоо хууртаад байна. Өнөөдөр монгол ээжүүд цуглаж байна. Ээж хүн гэдэг бүхэл бүтэн хүнийг бүтээж, төрүүлж, өсгөж, хүмүүжүүлдэг юм. Энд 94 настай буурай оффшорын эсрэг жагсахаар ирээд байна. Монгол хүн гэдэг бол монголынхоо төлөө санаа зовдог хүмүүсийг хэлдэг юм. Дэлгэцний цаана суучихаад хэн нь дийлэх вэ гэж харж суудаг хүнийг эх оронч гэдэггүй юм шүү. Бид алдаж болох юмаа бүгдийг алдлаа” гэв.
О.ӨНӨР