Аллиер мужийн Гадаад харилцаа, хамтын ажиллагаа хариуцсан мэргэжилтэн Вероник Эрүпэгийн санаачилгаар Moulin хотын Emaile Guillaumin сургуульд Монгол гэрийг барьж, Монголын түүх, өв соёлыг олон нийтэд таниулах ажлыг хийж байна.
Тус сургуульд 20 иргэншлийн 500 гаруй сурагч сурч, 40 орчим багш ажилладаг бөгөөд бүгд Монгол орны талаар зохих мэдлэгтэй болжээ. Тэрчлэн өөр сургуулийн сурагчдыг Монгол гэртээ урьж танилцуулан Монгол зан үйл, урлаг соёлыг сурталчилдаг аж.
Emaile Guillaumin сургуульд Монгол клубыг байгуулж, одоогоор найман сурагч гишүүнээр элсэн Монгол судлалыг явуулж байна. Тэд Монголд очих, Монгол найзтай болохыг хүсдэг гэж байв. Тус сургуулийнхан Өвөрхангай аймгийн ерөнхий боловсролын хоёрдугаар сургуультай хамтран ажилладаг бөгөөд цаашид харилцаагаа гүнзгийрүүлэх төлөвлөгөөтэй байгаа юм.
