Франц Улсад 2020 оны 11 дүгээр сарын 11-ний өдрийн байдлаар вирусын халдвар авсан шинэ тохиолдол 35879 /нийт 1865538/, нас баралтын тоо 328 /нийт 42535/ болж нэмэгдсэн бол эрчимт эмчилгээнд шилжсэн иргэдийн тоо 53 хүнээр /нийт 4803/ өсөв.
Францын эрүүл мэндийн мэргэжилтнүүд вирусын тархалт хөдөлгөөнийг дахин хязгаарласанаас хойш харьцангуй хяналтад орох шинжтэй гэж үзэж байгаагаа илэрхийлжээ.
Короновирусын дахин тусах магадлал хөдөлгөөний хязгаарлалт мөрдүүлэхээс өмнө нийт халдвар авагсдын тооны 1.42 хувьтай байсан бол хөдөлгөөний хязгаарлалт хийсэн 2 дахь долоо хоногт энэ тоо 0.93 хувь хүртэл буурсан нь нааштай үр дүн хэмээн үзэж байна. Хэрэв уг тоон үзүүлэлт 0.6-0.7 хувьд хүрч үүнийгээ 15 хоног хадгалсан нөхцөлд өдрийн шинэ тохиолдол харьцангуй бага буюу 5000-аас бага болох магадлалтай гэж эрүүл мэндийн судлаачид үзжээ.
Өнөөдөр 18 цагаас Францын Ерөнхий сайд Ж.Кастекс хэвлэл мэдээллийн хэрэгслээр вирусын нөхцөл байдал, авах арга хэмжээний талаар мэдээлэл хийхээр төлөвлөж байна.
Эх сурвалж: Монгол Улсын ЭСЯ