Дэлхийн долоон хүн тутмын нэг нь өдөр тутам ашигладаг Facebook өнөөдөр 12 нас хүрлээ. Анх 2004 оны энэ өдөр найзуудын хүрээлэлд нээгдэж байсан энэ сайтын хэрэглэгчдийн тоо сар өдрөөр өсч, өнгөрсөн оны мөн үетэй харьцуулахад 21 хувиар өссөн үзүүлэлт гарчээ.
Зөвхөн Монгол Улсад л гэхэд 1,3 сая хүн энэ сүлжээнд нэгджээ. Facebook-ийг үндэслэгч Марк Цукерберг улаан, ногоон өнгө ялгадаггүй харааны эмгэгтэй нэгэн. Харин цэнхэр өнгийг хамгийн сайн ялгадаг учир Facebook-ийг цэнхэр өнгөтэйгээр бүтээсэн гэсэн сонирхолтой мэдээлэл ч байдаг.
Одоогийн домайн хаягаа анх 2005 онд 200.000 ам.доллараар худалдан авч байсан бол одоо Facebook жилийн 17 тэрбум ам.долларын орлоготой ажилладаг болсон байна. Анх танил, дотно хүмүүсийг хооронд нь холбох ажлыг хийж байсан Facebook одоо гэрэл зураг, дүрс бичлэг, тэр ч бүү хэл 360 градусын дүрс бичлэг дамжуулдаг болжээ. Өнгөрсөн хугацаанд худалдан авсан WhatsApp хэрэглэгчийнхээ тоогоор тэрбум давж, Instagram 400 сая хэрэглэгчтэй болсон байхад Oculus төхөөрөмж нь тун удахгүй худалдаанд гарах гэж байна.
Уг сайтын дундаж хэрэглэгч нь өдөрт 1,72 цагийг буюу 103 минутыг Facebook-т өнгөрөөдөг. Facebook хэрэглэгчид нэг минут тутамд 4,1 сая удаа пост оруулж, Like, Share, Comment хийдэг байна. Өөрөөр хэлбэл хэрэглэгчид нь өдөр бүр зарцуулж буй 103 минутаа маш идэвхтэй өнгөрөөдөг гэнэ.
АНУ, Энэтхэг, Герман улсууд Facebook-ийн хамгийн их хэрэглэгчтэй орноор тодорчээ.