Испанийн Ла лигийн 35 дугаар тойргийн эхний тоглолт болж өндөрлөлөө. Энэ улиралд Аваргуудын лигийн шөвгийн наймд шалгарсан амжилт үзүүлээд буй Севияа талбайдаа Реал Сосидадтай тулж 1:0-ээр илүүрхсэн байна.
Тоглолтын цорын ганц гоолыг хоёрдугаар үеийн 47 дахь минутанд Эвер Банега торгуулийн цохилтоос оруулжээ. Аргентин хагас хамгаалагч Ла лигт энэ улирлын зургаа дахь гоолоо бүртгүүлсэн нь энэ юм.
Ингэснээр Севияа 35 тойргийн дараах байдлаар 51 оноотойгоор лигийн хүснэгтийн долоодугаарт бичигдэж байна.
Сонирхуулахад нэгэн цагт Манчестер Юнайтедийн гараанд гарч ирээдүйн “од” гэж нэрлэгдэж байсан Белги тамирчин Аднан Янузай Реал Сосидадын довтолгоонд гарч тоглосон ч хараахан гоол оруулж чадаагүй юм. Тэрээр энэ улиралд 17 тоглолтод оролцож 10 гоол оруулаад байгаа аж. Ялагдал хүлээсэн Реал Сосидад 46 оноотой хүснэгтийн 10 дугаарт бичигдэж байна.
О.ДАШНЯМ