Монгол Улсын Ерөнхийлөгчийн сонгуулийн тухай хуулийн төслийг УИХ-аар хэлэлцэж буй. Харин энэ төслийг МАН-ынхан өөрсдийн эрх ашигт нийцүүлсэн учраас дэмжихгүй гэдгээ МАХН-аас мэдэгдээд буй. Өнөөдөр МАХН-аас Ерөнхийлөгчийн сонгуулийн хуультай холбогдуулан хэвлэлийн хурал хийж, мэдэгдэл гаргалаа.
УИХ-ын гишүүн О.Баасанхүү: Энэ хуулиар зөвхөн МАН хүнээ нэр дэвшүүлэх боломжтой. АН, МАХН болон бусад намууд хамтарч хүнээ нэр дэвшүүлж, өрсөлдөх боломжгүй болгож байна. Бидний харж байгаагаар гуравхан хүн дэвшинэ. Тэр гурван хүнийг тэгш гараанаас явуулаач ээ. Тэгэхийн тулд сурталчилгааны зардлыг нь төрөөс даацгаая. Хандив авахыг нь, эдийн засгийн хараат байхыг нь болиулъя гэж бид үзэж байна. Ажлын хэсгийн эхний хуралдаан дээр төсвийг нарийвчлан ярьж байсан боловч байнгын хороо баталгаажуулсангүй. Энэ хуулинд “МАН-ын хүнийг дэмжицгээе” гэсэн үг л алга. Нийт олноос сонгогдож гарах төрийн тэргүүнийг улстөржүүлж, намжуулсан, хэтэрхий нэг талыг барьсан байгааг бид хариуцлагатайгаар эсэргүүцнэ. Бид Үндсэн хуулийн цэцэд хандана. Бүх төрийн байгууллагыг МАН гартаа авцан байгаа энэ үед ардчилал, шударга ёсонд аюул учирч байна. Тиймээс Монгол Улсын Ерөнхийлөгчийг МАН-тай нийлэхгүй байж, энэ хуулинд хориг тавих байх гэж найдаж байна.