УИХ-ын чуулганы өнөөдрийн хуралдаанаар Монгол Улсын Ерөнхий аудиторт нэр дэвшигчийг томилох асуудлыг хэлэлцлээ. Ерөнхий аудитор А.Зангад өөрийн хүсэлтээр ажлаас чөлөөлөгдөх болсонтой холбогдуулан Д.Хүрэлбаатарыг нэр дэвшүүлжээ. Төсвийн байнгын хороо хоёр өдрийн өмнөх хуралдаанаар эл асуудлыг авч хэлэлцээд дэмжсэн юм.
Чуулганы хуралдааны үеэр уг асуудлыг хэлэлцэх үеэр УИХ-ын гишүүн О.Баасанхүү, “Төрийн өмчийн компаниудад хяналт тавихад анхаараарай. Аудит бол хөндлөнгийн хяналт. Гэтэл банкууд, ялангуяа Хөгжлийн банкны асуудлыг ялгаж салгаад ард түмэнд үнэн бодит мэдээллийг өгөх нь зүйтэй юм” гэв.
Гишүүд асуулт асууж, үг хэлсний дараа хэлэлцэж буй асуудлаар санал хураалт явууллж, олонхийн саналаар А.Зангадыг Ерөнхий аудиторын үүрэгт ажлаас чөлөөлж, Д.Хүрэлбаатарыг тус албан тушаалд томилов. Д.Хүрэлбаатар нь 1961 онд Архангай аймагт төрсөн, эхнэр гурван хүүхдийн хамт амьдардаг. 2016 оноос Барилга, хот байгуулалтын сайдын орон тооны бус зөвлөх, Монгол Улсын Ерөнхий сайдын орон тооны бус зөвлөхөөр тус тус ажиллаж байжээ.