Хууль зүй, дотоод хэргийн яам, Цагдаагийн Ерөнхий газрын хэвлэл мэдээлэл, олон нийттэй харилцах төв хамтран сэтгүүлчдийн дунд эрх зүйн сургалт зохион байгууллаа. Сургалтад телевиз, сонин, мэдээллийн сайт, радиогийн 50 орчим байгууллагын сэтгүүлчид болон хууль зүйн яамны харьяа агентлагуудын хэвлэлийн төлөөлөгч нар оролцлоо.
Эрх зүйн сургалтыг Хууль зүйн яамны харьяа Цагдаа, дотоодын цэргийн сургалтын нэгдсэн төвд явуулсан бөгөөд ЦЕГ-ын тусгай тасгийн алба хаагчид нийтийг хамарсан эмх замбараагүй байдал болон олон нийтийн жагсаал цуглааны үед ард иргэдийн эрүүл, аюулгүй байдлыг хэрхэн хангах, мөн жагсаал цуглааныг хэрхэн тараах талаар үзүүлэх сургалт явуулж, сэтгүүлчдийг аравтын системд хувааж, амжилттай оролцсон сэтгүүлчдэд батламж олголоо. Мөн терроризмын үед болон хүн барьцаалсан үед хэрхэн аврах ажиллагаа явуулах талаар ЦЕГ-ын тусгай хамгаалалтын газрын алба хаагчид практик сургалт явууллаа.
Сэтгүүлчдийн дунд Зөрчлийн тухай хууль болон хэргийн газрын үзлэг, сургуультай нохдоор хэрхэн гэмт хэрэг илрүүлэх, гэмт этгээдийг барих зэрэг мэргэжлийн хэмжээний сургалтуудад хамрууллаа. Үүний дараа ЦЕГ-ын “Хүч” спорт хорооны дарга, цагдаагийн хурандаа Д.Батмөнх тэргүүтэй алба хаагчид сэтгүүлчдийн дунд буудлага, олс таталтын тэмцээнд зохион явуулж, “Хүч” спорт хорооны үйл ажиллагаа, тамирчдын үзүүлсэн амжилтын талаар яриа өрнүүллээ.
Сургалтад хамрагдсан сэтгүүлчдийг 12-оор дөрвөн баг болгож, сургалтад хамрагдсан байдал, сахилга хариуцлага, тэмцээн уралдаанд оролцсон байдлаар нь байр эзлүүлэн, тэргүүлсэн багт шилжин явах цом олголоо. Мөн өдөрлөгийн төгсгөлд бүх сэтгүүлчдэд “Эрх зүйн мэдлэг”-ийн 0.5 кредит цагийн үнэлгээтэй сертификат олгов. Энэхүү сертификат эрх зүйн сургалтад хармагдсаны баталгаа бөгөөд дараа жил дахин суралцаад кредит цагаа ахиулах, түүнчлэн мэргэшсэн сэтгүүлч болох боломжийг олгох аж.
Ширүүн өрсөлдөөн, авхаалж самбаа, багааар ажиллах чадвар, өөр мэргэжлийн үнэ цэнийг ухааруулсан нэг өдрийн сургалтын төгсгөлд мэргэжлийн байгууллагаас эх сур сурвалж, баримт нотолгоог түшиглэсэн “Эрэн сурвалжлах сэтгүүлчдийн клуб” байгууллаа. Энэ клубт сургалтад хамрагдсан бүх сэтгүүлчид хамрагдах бол удирдах зөвлөлийн долоон гишүүнтэй байхаар тохирч дундаасаа тэргүүлэгчдээ сонголоо.