Улсын хэмжээнд асч буй 22 түймрийг унтраахад Онцгой байдлын албанд “Эрдэнэс-Таван толгой” компаний ажилтнууд дэмжлэг үзүүлэн нэг өдрийн цалингаа хандивлахаар болжээ.Тус компани нийт 600 гаруй ажилтантай бөгөөд Сэлэнгэ аймгийн Ерөө, Мандал, Хүдэр, Төв аймгийн Батсүмбэр суманд гарсан гал түймрийг унтраахаар ажиллаж байгаа онцгой байдлын алба хаагчид, орон нутгийн иргэд, байгаль хамгаалагчдад сэтгэл санааны болон эд материал, хүн хүчний дэмжлэг үзүүлэх юм.
Компаний хамт олон ОБЕГ, Хан Хэнтийн Улсын Тусгай хамгаалалтын газрын албаны хүмүүстэй холбогдож, хэрэгцээтэй зүйлсийг нь тодруулж, түүнийг нь түймрийн бүсэд хүргэж өгөх юм. “Эрдэнэс-Таван толгой” компани одоогийн байдлаар ажилтнуудынхаа нэг өдрийн цалин, усны сав, явуулын эмийн сан, хоол хүнс болон 5000 ширхэг амны хаалт хандивлахаар бэлтгэл ажлаа хангаж байна.
Ц.МИШЭЭЛ