Монголын хөлбөмбөгийн холбооноос зохион байгуулдаг Футзалын УАШТ-ий медалийн эзэд болон шилдэг тоглогчдын нэр өчигдөр тодорч, “Эрчим” клуб 2018 оны Монгол Улсын аварга баг болов.
Хүрэл медалийн төлөөх тоглолт “Хан-Уул клуб”, “Замчин” багуудын хооронд болоход төмөр замчдын төлөөллүүд өрсөлдөгчөө 11:2-оор илүүрхэн, медалийн тавцанд гарах болзол хангасан юм. Аваргын төлөөх тоглолт “Эрчим”, “Капитрон” багуудын хооронд болоход хөлбөмбөгийн үндэсний дээд лигийн 12 удаагийн аварга “Эрчим” 4:2-оор хожиж, аваргын цомыг өргөлөө.
Медалийн төлөөх тоглолтуудын дараа тэмцээний шилдгүүдийн тодруулахад, Б.Ариунболд “Эрчим” шилдэг хаалгач, М.Энх-Од “Капитрон” шилдэг тэгш тоглогч, Б.Цогтбаатар “Хан-Уул клуб” шилдэг мэргэн буучаар тус тус тодорлоо.
Тэмцээний шилдгүүд футзалын УАШТ-ий медалийн энгэртээ гялалзуулснаас гадна “Би Си Эйч Лионс”, “Улаангом сити”, “Хан-Уул клуб”, “Замчин”, “Капитрон”, “Эрчим” гэсэн зургаан баг “Футзалын нэгдүгээр лиг”-ийн эрх авлаа. “Футзалын нэгдүгээр лиг” 2019 оны нэгдүгээр сарын 05-нд эхэлнэ.