Монголын Хөлбөмбөгийн Холбооноос жил бүр уламжлал болгон зохион байгуулдаг “Холбооны цом-2015” тэмцээний шигшээ тоглолт өчигдөр өндөрлөж, аваргуудаа тодрууллаа. Сонирхогчдын болон “Хүрхрээ нэгдүгээр лиг”, “Хүрхрээ” үндэсний дээд лигийн 24 баг оролцсоноос шигшээ тоглолтод “ФС Улаанбаатар”, “Эрчим” багууд шалгарсан юм. Энэ улиралд дээрх багууд хоёр ч удаа учраа тааран тоглоход “Эрчим” клуб ялалт байгуулсан.
Тоглолтын үндсэн цаг 0:0 харьцаатай өндөрлөсөн юм. Ингээд дүрмийн дагуу нэмэлт 30 минутыг сунгасан бөгөөд энэ хугацаанд “Эрчим” багаас Никола Дуричич 92 дэх минутанд энэ тоглолтын анхны гоолыг оруулж багтаа маш том тэргүүллийг авчирсан. Түүнчлэн сунгасан цагийн сүүлийн 15 минутанд Эрнани Мауро хоёр ч бөмбөг эсрэг багийн хаалганд оруулсанаар “Эрчим” хожил байгуулах нь тодорхой болж ирсэн. Сэлгээгээр орж ирсэн Ц.Энхтөр мөн дахин нэг бөмбөг оруулснаар 4:0 харьцаатай “Эрчим” баг хожил байгууллаа.