Энэтхэгийн төв хэсэгт өнгөрсөн Мягмар гаригт бөмбөг дэлбэрсний улмаас Бхаратяяа Жаната намын (BJP) дарга тэргүүтэй таван хүн амиа алдсан талаар орон нутгийн цагдаагийн байгууллагаас мэдээлэв. Амиа алдсан улс төрч Бхима Мандави нь Чхаттисгарх мужийн хууль тогтоох байгууллагын гишүүн бөгөөд сонгуулийн цуглаанаас буцаж явахдаа ийнхүү халдлагад өртжээ.
Чхаттисгарх мужийн Дантевада дүүрэгт гарсан энэхүү халдлагыг маоист босогчид үйлдсэн хэмээн сэжиглэж буй талаар тус улсын цагдаагийн газраас мэдээлсэн байна. Тус мужийн цагдаагийн газрын даргын туслах Чандрамохан Сингх нас барсан бусад дөрвөн хүний хувьд ч улс төрийн зүтгэлтнүүд байсан талаар CNN-д мэдээлжээ. Тэднийг гурван машин хамгаалж явсан байна. Энэхүү халдлагыг сайжруулсан тэсрэх төхөөрөмж ашиглан үйлдсэн хэмээн Сингх нэмж хэлжээ.
Энэтхэгийн Ерөнхий сайд Нарендра Моди маоистуудын халдлагыг зэмлэн буруушааж байгаагаа твиттер хуудастаа жиргээд, бөмбөгдөлтөд өртөн амиа алдсан таван хүний ар гэрийнхэнд гүн эмгэнэл илэрхийлж буйгаа мэдэгдсэн байна.