Монголын үйлдвэрчний эвлэлийн холбоо, Эрүүл мэндийн ажилчдын үйлдвэрчний эвлэлийн хорооноос Эрүүл мэндийн салбарын ажилтнуудын цалин хөлсний асуудлаар Засгийн газартай хийсэн хэлэлцээрийн үр дүн, шийдвэрийн талаар мэдээллээ.
Эрүүл мэндийн салбарын ажилтнууд цалингаа хоёр дахин нэмэгдүүлэх шаардлагыг тавьж талбай дээр арав дахь өдрөө суулт хийж байгаа юм. Тэд салбарын сайдтай зөвшилцөлд хүрсэн хэмээн мэдээлсэн ч Засгийн газраас 2021 оны төсөвт хоёр дахин нэмэгдүүлэх боломж байхгүйг мэдээлсэн.
Тэгвэл эмч нар УИХ-ын шийдвэрт хориг тавих хүсэлтийг Ерөнхийлөгчид өнөөдөр өгөх болсон талаараа мэдээллээ.
Эмч нарын төлөөлөл “Боломж нь байгаа хэр нь байшин барилгад төсөв батлаад хүний алтан амь авардаг эмч нарыг халуун наранд ингээд суулгаж байна. Төсвийн мөнгийг хоёр дахин нэмэгдүүлэх ямар эмнэлгүүд байгаа, ямар эх үүсвэрээр олгох боломжтой гэдгийг ЭМЯ-наас 15 цагаас өмнө гаргаж өгөхийг шаардаж байна” гэлээ.
Мөн “Одоогоор 3000 эмч, мэргэжилтнүүд халдвар аваад зарим нь сэхээнд орж, амиа алдаад байна. Салбарын 30 хувь нь сөхөрч унасны дараа бид суултаа эхлүүлсэн. Халдвартай тэмцэж, тэргүүн эгнээнд ажиллах эмчгүй болоод, цусаар уйлсан ч нэгэнт оройтсон байх вий. Нөхөн олговор авсан эмч одоогоор байхгүй, үндсэн цалингийн 50 хувь буюу лист л олгож байна” гэлээ.